当前位置:主页 > L生活店 >

【轮证赢家】27000点穿得未?


2020-06-13


【轮证赢家】27000点穿得未?放大图片

噚日拣咗只恒指牛(60281)出嚟,虽然miss咗最靓嘅入市位同出货位(讲紧係噚日朝早11点40分),不过噚日都有唔少位可以入到市,最后一击就係下画3点20分嗰一转,但喺呢一转入市嘅话,就预咗有过夜嘅心理準备。

噚晚接近10点到,收到台嘅一个message,话「特朗普称预计将在APEC会议与中国签署贸易协议,美股标普500指数早段创新高」,心谂只(60281)无死啦,第二朝一开市就掉走先。到今朝起身开电视时,见到新闻台右下角嘅日经粒数都係升几十点,恒指唔通今日凶多吉少?

今朝坐巴士返工时喺隧道有啲塞,塞到直头停咗喺隧道里面,对我嚟讲就无乜嘢嘅,不过坐喺我前面两位小姐个表情就有啲唔耐烦;而坐喺我隔离嗰位西装哥仔就扯晒鼻鼾...明白嘅,呢啲天气就算瞓10个钟都係觉得未够嘅。而我就喺巴士上面打住机嘅同时,望住坐喺我对面嗰位小姐只手錶嘅时间(我係唔带錶架),见到9点20分过啲啲,就quit只game app,开返只报价app出嚟,见到恒指开市报27027点,升136点。27000点一下子又穿过,唔通就係因为噚晚个消息?係嘅话就唔会穿得嗰27点咁孤寒啦。

返到公司大约9点50分,开晒电视电脑之后,见到news team同事做紧林郑个live,到我电视有画面时,见到右下角恒指升幅大为收窄至得10零点。到依家10点22分,恒指已经由升转跌,做紧26874点,跌17点。

睇返恒指5分钟图,今朝高开嗰下其实係无乜点扯高到条SlowSTC(14,3),跟手恒指就呈高开低收,同步见DMI嘅ADX喺开市头嗰25分钟係上扬,即係话今朝早恒指高开低收嗰一下係有力下行,至今SlowSTC(14,3)已经落到去严重超卖水平,如果依家将(60281)即时放走嘅话,咁做就实在太蠢。

再睇埋恒指牛熊证街货图,噚日恒指高位其实都上过27000点楼上,所以今日见熊证街货最贴价嘅就係27000至27099点,呢度有相当于394张期指,至于牛证最贴价嘅就係26700至26799点,呢一层係新增街货层,有相当于149张期指。睇返成个牛熊证街货图,熊证喺第二同第三贴价嘅街货层上,各自都有逾相当于600张期指街货喺度,估计大家都係见到条100天线同「中期下降轨」顶住27000点呢个位,相信会屡攻不破,所以储定肥熊喺度。至于牛熊方面,最贴价嗰三层都唔係多货,讲紧最多只有相当于200张期指,但重货区就係喺26400至26499点,呢度有相当于769张期指。

依家10点32分,恒指做紧26867点,跌23点,虽然点数上係靠近牛证区,但见5分钟图上SlowSTC(14,3)始有低位回升迹象,就比多少少时间再睇吓个市再弹可以弹到有几高,再决定(60281)去或留。

无货想追?不了,都係企喺侧边睇吓个市点爆先再算。

作者阿珊,任财经/投资版传媒人十几年,《钟摆战略赢港股》作者。用技术分析专心玩轮证,唔贪心,志在搵餐下午茶。

电邮:[email protected];FB:轮证赢家



上一篇:
下一篇: